Reagimi i Kolonelit Veseli ndaj Aleksandar Vulin dhe Serbisë: “FSK nuk kërcënon askënd, por mbron lirinë dhe sovranitetin e Kosovës”

Koloneli në pension i FSK-së, Afrim Veseli i është drejtuar popullit serb me një mesazh të fuqishëm kundër propagandës së Beogradit, duke theksuar se Ushtria e Kosovës është mburojë e paqes dhe jo kërcënim për Serbinë.

Koloneli dhe ish-ushtaraku i Forcës së Sigurisë së Kosovës, Afrim Veseli, ka shpërndarë një mesazh të fuqishëm drejtuar popullit dhe qytetarëve serbë të Serbisë, ku sqaron se Ushtria e Kosovës nuk përbën kërcënim për askënd, por ekziston për të mbrojtur lirinë dhe sovranitetin e Republikës së Kosovës.

Në letrën e tij publike, Veseli ka theksuar se FSK është ushtri e bazuar në vlerat e demokracive perëndimore, dhe se çdo ditë zhvillohet e stërvitet në bashkëpunim me ushtritë e shteteve mike të NATO-s.

“Ju nuk duhet të keni frikë nga FSK. Ajo është një ushtri që ka mision ruajtjen e territorit dhe sovranitetit të Republikës së Kosovës. Ajo është krijuar mbi vlerat e ushtrive të shteteve demokratike perëndimore”, shkruan Veseli.

Koloneli i FSK-së i ka drejtuar edhe kritika të ashpra udhëheqësve të Serbisë, përfshirë presidentin Aleksandar Vuçiq dhe ministrin Aleksandar Vulin, të cilët, sipas tij, po e përdorin propagandën kundër Kosovës për t’u mbajtur në pushtet dhe për të ushqyer shovinizmin në Serbi.

“Deklaratat e zyrtarëve të shtetit tuaj janë vetëm një propagandë e ulët, për të ushqyer shovinistët që i kanë rreth vetes, me qëllim të mbajtjes së pushtetit. Vuçiq dhe Vulin nuk janë njerëzit që mund të përfaqësojnë interesat tuaja. Ata sundojnë mbi të ardhmen tuaj për t’u pasuruar, derisa ju të varfëroheni edhe më shumë”, ka theksuar Veseli.

Në vazhdim të mesazhit, koloneli Veseli kujton plagët e luftës dhe krimet e kryera nga regjimi serb gjatë viteve ’90, duke rikujtuar se Kosova ende ka mbi 1500 persona të zhdukur, eshtrat e të cilëve nuk janë gjetur, e shumë prej tyre besohet se ndodhen ende në varreza të fshehta në territorin e Serbisë, përfshirë Batajnicën.

Lexo edhe: Audioincizimi – Zyrtarët e Speciales iu ligjëruan nxënësve të Kosovës se si UÇK-ja dyshohet se ka kryer krime, vrasje e tortura

“Shqiptarët dhe Kosova ende jetojnë me plagët e tmerreve të njerëzve si këta. Kosova ende ka mbi 1500 të vrarë që s’kanë varre; eshtrat e tyre dergjen diku në tokën tuaj”, shkruan ai.

Në fund, Veseli u bën thirrje qytetarëve serbë që të jetojnë në paqe me fqinjët shqiptarë, kroatë dhe boshnjakë, duke nënvizuar se shqiptarët nuk kanë sulmuar kurrë tokat e Serbisë, por kanë mbrojtur vetëm lirinë e tyre.

“Ne duam paqen dhe lirinë, dhe të njëjtën gjë e dëshirojmë edhe për ju. Jetoni në paqe me fqinjët shqiptarë, kroatë dhe boshnjakë. Ne e duam lirinë e fituar dhe atë do ta mbrojmë”, përfundon letra e kolonelit Afrim Veseli.

Ky mesazh i qetë por i fuqishëm ka marrë vëmendje të gjerë në rrjete sociale dhe media, duke u vlerësuar si një deklaratë dinjitoze dhe profesionale e një ushtaraku shqiptar, që thekson vlerat e paqes dhe të mbrojtjes së lirisë.